١٠ی خاکەلێوە بیرهێنانەوەی یەکێک لە تاڵترین و لە هەمان کاتدا سەربەرزترین لاپەڕەکانی مێژووی خەباتەکانی نەتەوەی کوردە. لە ڕۆژێکی وەک ئەمڕۆدا لە ساڵی ١٣٢٦ هەتاویدا ڕژیمی توتالێتاریزمی و داگیرکەری ئێرانی قازی موحەممەد، ڕێبەری کۆماری کوردستان و سەیفی قازی و سەدری قازیان لە سێدارە دا. ئەم تاوانە نەک هەر هەوڵێک بوو بۆ سەرکوتکردنی خواستەکانی نەتەوەی کورد، بەڵکو ئەو جەنایەتە نیشانی دا کە داگیرکەران لە ئیرادەی نەتەوەیەک ئازاد و بیرمەند و ئازادیخواز دەترسن.
قازی موحەممەد، هێمای شانازی و سەربەخۆیی نەتەوەی کورد، گیانی خۆی لە پێناو ئازادی و دادپەروەری و سەربەخۆیی بەخت کرد. کۆماری کوردستان هەرچەندە تەمەنی کورت بوو، بەڵام لە مێژووی خەباتەکانی نەتەوەکەماندا جێپەنجەیەکی ئەبەدی بەجێهێشت و سەلماندی کە کوردستان شایستەی ئازادی و سەروەرییە بەسەر چارەنووسی خۆیدا.
یەکێتی شۆڕشگێڕانی کوردستان و ڕیکخراوی یاری کورد ، وەک میراتگرانی ڕێبازی قازی موحەممەد و هەزاران شەهیدی ڕێگای ئازادی، پێیان وایە ئەم خەباتە تا ئەو ڕۆژە بەردەوام دەبێت کە کوردستان سەربەخۆیی تەواو بەدەست نەهێنێت. دوژمنانی نەتەوەی کورد دەبێ بزانن کە هەر دڵۆپە خوێنێک کە لە ڕێگای ئازادیدا ڕژاوە نەک هەر لەبیر ناچێت، بەڵکو دەبێتە ڕووناکییەک لەسەر ڕێگای خەباتی نەتەوەی کورد بۆ ڕزگاربوون لە داگیرکاری و چەوساندنەوە.
لەم ڕۆژە مێژووییەدا، جەخت لەسەر پەیمانی خۆمان لەگەڵ نەتەوەی کورد دەکەینەوە و داوا لە هەموو تێکۆشەران و ئازادیخوازان و گەلی کوردستان دەکەین کە بە یەکڕیزی و خۆڕاگری و ئیرادەیەکی پتەو درێژە بە ڕێبازی شەهیدەکانمان بدەین و ڕێگە نەدەن ئایدیاڵە پیرۆزەکانی قازی موحەممەد و قارەمانەکانی تری ئەم خاکە لەبیربکرێن.
ڕێبازی قازی موحەممەد پڕڕێبوار و کوردستان ئازاد دەبێت!
