بەناوی ئازادی و ئیرادەی میللەتەوە!
ڕۆژی دووی ڕێبەندان ٢٦٤٥ک (٢ی ژانویەی ١٩٤٦) خاڵێکی درەوشاوەی مێژووی نەتەوەی کوردە، کە خەون و خواستە لەمێژینەکانی ئەم نەتەوەیە بە ڕاگەیاندنی کۆماری کوردستان لە گۆڕەپانی چوارچێرا هاتە دی. ئەم ڕۆژە ڕەمزی ڕاوەستان و بەدواداچوونی ئازادی میللەتێکە کە چەندین سەدە لە زنجیرەی ستەمدا ژیاوە و بە ئیرادەی خۆیەوە، دواجار ئاڵای سەربەخۆیی و ناسنامەی لە دژی کۆلۆنیالیزم و ستەمکاری داگیرکەر لە بەشێکی زۆری ڕۆژهەڵاتی کوردستان بەرزکردۆتەوە.
کۆماری کوردستان: دەنگی ئازادی و هێمای بەرخۆدان
ڕاگەیاندنی کۆماری کوردستان تەنیا دامەزراندنی حکوومەتێکی خۆجێیی نەبوو؛ بەڵکو دەرکەوتنی خەباتێکی چەند سەدە و سەرەتای ڕێگای دوورودرێژی ئازادی و سەربەخۆیی کوردستان بوو. ئەم بۆنە مەزنە بە ڕێبەرایەتی قازی موحەممەد بە یاوەریی ئەفسەرانی ئازا و ڕۆشنبیرانی بوێر و پشتیوانی خەڵکی بە پەرۆشی هاتە ئاراوە و بوو بە نمونە بۆ هەموو ئازادیخوازان لە سەرتاسەری کوردستان.
کۆماری کوردستان دەرئەنجامی قوربانیدانی سەرکردەکانی وەک شێخ عوبەیدوڵڵا نەهری، شێخ سەعید پیران،سەی رەزای دەرسیم، سمکۆ شکاک، مەلیک مەحمود نەمر، ژەنەڕاڵ ئیحسان نوری پاشا شێخ ئەحمەدی بارزان و قازی موحەممەد بوو کە هەریەکەیان گیان و وزەی خۆیان لە پێناو دۆزی نەتەوەی کورددا بەخت کرد. ئەم کۆمارە کورتخایەنە بەڵام سەربەرزە شوناسێکی بە نەتەوەی کورد بەخشی، ئازادیی ڕادەربڕین و ڕۆشنبیری بەرەوپێش برد و بە دامەزراندنی ڕادیۆ و سینەما و چاپەمەنی و سوپای نەتەوەیی نیشانی دا کە کوردستان شایستەی حکومەتی خۆیەتی.
کۆماری کوردستان: چرای خەبات و یەکڕیزی
هەرچەندە تەمەنی کۆماری کوردستان لە یازدە مانگدا خایاند، بەڵام ئایدیاڵ و پەیامەکەی لە دڵ و مێشکی گەلی کورددا زیندوو مایەوە. شکستی ئەم کۆمارە کۆتایی خەبات نەبوو، بەڵکو سەرەتایەکی نوێ بوو بۆ بزووتنەوە ئازادیخوازەکانی پارچەکانی دیکەی کوردستان. ئاڵای کۆماری کوردستان هێشتا هێمای یەکڕیزی و خۆڕاگرییە بۆ نەتەوەیەک کە هەرگیز تەسلیمی زنجیرەی ستەمکاری نەبووە.
ڕێکخراوی یاری‌کورد (یارسان) و یەکێتی شۆڕشگێرانی کوردستان، بە ئیلهام وەرگرتن لە بەها بەرزەکانی کۆماری کوردستان، پێیان وایە کە:
- تێکۆشان بۆ ئازادی و سەربەخۆیی کوردستان دەبێ سەرهەڵبداتەوە بە شێوەی شۆڕشگێرانە تا ئامانجەکانی میللەت بە تەواوی بەدی دێت.
- ئاڵای کوردستان هێمای شوناس و شەرەفمانە و هەرگیز ناکەوێتە سەر زەوی.
- هیچ سازشێک لەگەڵ دوژمنان و داگیرکەرانی خاکی کوردستان نابی قبوڵ بکرێت.
- بە دڵسۆزی ڕێبازی قازی موحەممەد و شەهیدانی تری ڕێگای ئازادی دەمێنینەوە و بۆ بنیاتنانی داهاتوێکی گەش بو کوردستان و بە یەکگرتوو ی و و سەقامگیر هەنگاو دەنێین لەپێناو بەختەوەری گەڵەکەمان.
هەرچەند کۆماری کوردستان تەمەنی کورت بوو ، بەڵام ئەو میراتە مەزنە کە بە قوربانی و تێکۆشان دریژەی پیدا کرد و مەشروعیەتی دا بە بزاڤی رزگاریخوازی گەلی کورد و هیچ زریانێکی سیاسی نیتوانی چۆوکی پێبدات و تا ئیستاە ئەو فاکتورە نەتەوییە بووەتە هۆکاری سەقامگیری سیاسی و ئەخلاقی نەتەوەی کورد و هاوکات بووەتە رەمزی یەکریزی و بەها بەخشین بە سەرکەوتن .
مەرگ بۆ داگیرکەران و دوژمنانی ئازادی
