میللەتی بە پەرۆش و ئازادەی کورد !
٢٦ی سەرماوەز ڕۆژی ئاڵای کوردستان، یەکێکە لە گرنگترین و شکۆمەندترین ڕۆژە نەتەوەییەکانمان. ئەم ڕۆژە ڕەمزی ئیرادەی نەتەوەیی کوردە بۆ وەستانەوە لە بەرامبەر ستەم و داگیرکاری و نکۆڵیکردن لە ناسنامەمان. ئاڵای کوردستان ، بیرهێنانەوەی تێکۆشان و قوربانیدانی ئەو نەوەێکە کە گیانی خۆیان بەخت کرد بۆ ئازادی و سەربەخۆیی نەتەوەی کورد.
ئاڵای کوردستان تەنیا نیشانە نییە؛ ئەم ئاڵایە هێمای ناسنامە و مێژوو و ئایدیاڵە کە میللەتەکەمان بەرگەی ئازاری بێشوماری گرتووە و بە هەزاران قوربانی داوە و بە هەزارانیش ڕێبواری ئەم رێگا پیرۆزەن. ڕۆژی ئاڵای کوردستان یادی دامەزراندنی کۆماری کوردستان بە ڕێبەرایەتی شەهید قازی موحەمەد لە ساڵی ١٩٤٦؛ ئەو ڕۆژەی کە میللەتی کورد توانی بۆ یەکەمجار حکومەتێکی سەربەخۆ دابمەزرێنێت و ئاڵای خۆی هەڵبکات.
بۆچی ٢٦ی سەرماوەز گرنگە؟
لەم ڕۆژە مێژووییەدا ئاڵای کوردستان وەک ڕەمزی کۆماری کوردستان لە شاری مەهاباد و زۆربەی شارەکانی کوردستانی ڕۆژهەڵات هەڵکرا. ئەم ئاڵایە نوێنەرایەتی خواستی ئازادی و ئیرادەی نەتەوەی کورد دەکرد کە دوای چەندین ساڵ لە چەوساندنەوە و داگیرکاری توانی حکومەتێکی سەربەخۆ پێکبهێنێت. هەرچەندە ئەم کۆمارە تەنها ١١ مانگی خایاند و بەهۆی خیانەتەکانی حکومەتە کۆلۆنیالیستەکان و هاوپەیمانەکانیانەوە توشی شکەست بوو، بەڵام پەیام و میراتەکەی مایەوە و بوو بە مەشخەڵی خەبات بۆ نەوەکانی داهاتوو.
ڕۆژی ٢٦ سەرماوەز ئەو خەڵکە نیشان دەدات کە لە بەرامبەر دوژمنانی بێشومار وەستانەوە بۆ گەیشتن بە ئازادی. هەروەها ئەم ڕۆژە وەبیرهێنانەوەی ئەو بەڵێنەیە کە خەڵکی کوردستان بە ئاڵاکەیان داوە:
هەرگیز خەبات و تێکۆشان ڕاناگرین تا ئەو ڕۆژەی ئەم ئاڵایە لە هەموو کوردستانی ئازاد هەڵدەکرێت.
کاروانی ئاڵا!
یەکێتی شۆڕشگێڕانی کوردستان بڵین بە پێداگری و تێکۆشان زیاتر بە یادی شەهیدانی "کاروانی ئالا. کە لە ١٧ی ڕەشەمەی ١٩٩٤دا، کۆمەڵێک پێشمەرگەی ئازا، کە دوای چالاکێکی چەند مانگی کە دوای کۆماری کوردستان بو جارێکی دیکە لە شارەکانی ڕۆژهەڵاتی کوردستان ئاڵا هەڵکراوە و بە کاروانی ئاڵای ناسرا بوون، لە هێرشێکی ترسنۆکانەی هێزە تیرۆریستییەکانی سپای پاسداران گرووی زەربەت شەهید بوون. ئەم شەهیدانە بە قوربانیدانی خۆیان فێریان کردین کە ئاڵای کوردستان تەنها هێما نییە، بەڵکو بەڵێنێکە کە هەموو کورد دەبێت وەفاداری بێت .
داواکارین لە هەموو خەڵکی کوردستان لەم ڕۆژە پیرۆز و مێژوویەدا ئاڵای پیرۆزی کوردستان بەسەر ماڵ و گوند و شارەکانیاندا هەڵبکەن. ئەم کارە هێمای یەکڕیزی و خۆڕاگری و دڵسۆزیمانە بۆ ئایدیاڵە نەتەوەیی و مێژووییەکانمان.
ڕۆژی ئاڵای کوردستان بیرهێنانەوەی ئەرکی ئێمەیە بۆ درێژەدان بە خەبات. یەکێتی شۆڕشگێڕانی کوردستان و ڕێکخراوی یاری کورد بە دەنگی بەرز ڕایدەگەیەنێت کە تاکە ڕێگای گەیشتن بە ئازادی یەکڕیزی و خۆڕاگرییە. جارێکی تر بەڵێن دەدەین بەردەوام بین لە خەبات لە پێناو گەیشتن بە ئامانجەکانی شەهیدانی کوردستان.
بژی کوردستانی ئازاد و سەربەخۆ!
شەکاوە بێت ئاڵای کوردستان!
مردن و نەمان بۆ داگیرکەران و دوژمنانی ئازادی!
