بریتانیا: دیداری کاکی ڕۆستەم ئەڵماسی لە گەڵ بەشێک لە ئەندامانی یەکێتی شۆڕشگێڕانی کوردستان
ڕۆژی ١٧ی جولای ٢٠ ٢٢ چەند ئەندامێکی یەکێتی شۆڕشگێرانی کوردستان لە لەندەن سەردانی کاکی ڕۆستەم ئەڵماسی سەرۆکی یەکێتی شۆڕشگێران و ئەندامی دەستەی سەرۆکایەتی هاوپەیمانی سەربەخۆییخوازانی کوردستانیان کرد و لە نزیکەوە کۆمەڵێک باس و بابەتی پێوەندیدار بە خەباتی یەکێتی شۆڕشگێران و هاوپەیمانیی سەربەخۆییخوازانی کوردستان، تاوتوێ کران.
لەو دانیشتنە دا کاکی ڕۆستەم ئەڵماسی وێڕای شیکردنەوەی سیاسەتی هاوپەیمانی، ئاماژەیەکی بە دۆخی ئێستای جیهان و ناوچەکە و ڕەوشی کورد لە ئێستا و داهاتوو دا کرد و ئاماژەی بەوە دا کە تاکە ڕێگەی گەیشتنی گەلی کورد بە ماف و ئازادییەکانی، خەباتە لە پێناو گەیشتن بە سەربەخۆیی و دامەزراندنی دەوڵەتی سەربەخۆی کوردستان.
ئەندامی دەستەی سەرۆکایەتی هاوپەیمانی لەو دانیشتنە دا وێڕای هەڵسەنگاندن و خەسارناسییەک لە سەر خەباتی ڕزگاریخوازانەی نەتەوەی کورد، باسی لەوە کرد کە قۆناغی خەبات ئەمڕۆ گؤرانی بە سەر داهاتووە و مێتۆدی بیست ساڵ و نیو سەدە لەمەوبەر ناتوانێ وەڵامدەری خواست و ویستی کۆمەڵانی خەڵکی کوردستان بێ و پێویستە بە نەفەسێکی تازە و بە پێی سیاسەتی ڕۆژ خەبات و تێکۆشانمان بەڕۆژ و ئابدەیت بکەینەوە.
لە کۆتایی ئەم دانیشتنە دا کاکی ڕۆستەم ئەڵماسی گوتی: ڕەمزی سەرکەوتنی خەبات و جووڵانەوەی ڕزگاریخوازیی گەلی کورد یەکبوون و یەکڕیزیی ناو ماڵی کوردە.
پێویستە بگوترێ کە هەر یەک لە بەڕێزان خەبات، هێژا و بەختیار لەو دانیشتنە دا ئامادە بوون و کۆمەڵێک باس و تێبینی تایبەت بە خەبات و جووڵانەوەی نەتەوەی کورد بە تایبەتی لە ڕۆژهەڵاتی کوردستانیان هێنایە بەر باس و لە لایەن کاکی ڕۆستەم ئەڵماسیەوە وڵامیان درایەوە.
